Xaçmazda yerləşən N saylı hərbi hissənin əsgəri Tural Xudaverdi oğlu Ibrahimov zabitlər tərəfindən döyülərək öldürülüb. Bu barədə “Azadlıq”a məlumatı əsgərin yaxınları verib.
Onların sözlərinə görə, Tural Ibrahimov  2010-cu ilin oktyabrında Tovuz rayonu hərbi komissarlığından həqiqi hərbi xidmətə çağırılıb. 1991-ci il təvəllüdlü əsgəri 2010-cu ilin dekabrın 31-i axşam saatlarında zabitlər qəddarlıqla döyüb. Tural Ibrahimovun ölümcül vəziyyətdə olmasına baxmayaraq o, yanvarın 2-nə qədər hərbi hissədə saxlanılıb. Yanvarın 2-də isə ağır vəziyyətdə olan əsgər Müdafiə Nazirliyinin Bakıdakı hərbi hospitalına yerləşdirilib. Iki gün sonra, yanvarın 4-də Tural Ibrahimov hospitalda keçinib.
Əsgərin yaxınları bildirir ki, Məhkəmə tibbi ekspertizasının verdiyi rəydə ölümün səbəbi travmatik şok, çanaq orqanlarında travma, qarın boşluqlarında qan travması, çanaq sümüyünün sınığı göstərilib. Tural Ibrahimovun yaxınları faktla bağlı şikayət etsələr də, cinayət işi qaldırılmayıb.
Müdafiə Nazirliyinin mətbuat xidmətinin rəis müavini Teymur Abdullayev isə APA-ya açıqlamasında əsgərin xəstəlikdən vəfat etdiyini bildirib.